کەنەکە: با نەورۆزی ٢٠٢٠ ببێتە سەنگەری تەبایی و هەماهەنگی

کەنەکە، داوادەکات نەورۆزی ٢٠٢٠ ببێتە سەنگەری تەبایی و هەماهەنگی ناوخۆیی و سەرکەوتنی زیاتر، ڕاشیدەگەیەنێت کە پێویستە لەم قۆناغەدا نەورۆز ببێتە مەشخەڵی ڕووناکی بۆ یەکڕیزی و هەماهەنگی تێکۆشانی خەڵکی کوردستان.

کۆنسەی بەڕێوەبەریی کۆنگرەی نەتەوەیی کوردستان (کەنەکە)، بەبۆنەی هاتنەوەی جەژنی نەورۆز، ڕاگەیەندراوێکی بڵاوکردەوە.

دەقی ڕاگەیەندراوەکەی کەنەکە بەم شێوەیەیە:

جەژنی بەرخۆدان، جەژنی ئازادیی، نەورۆز پیرۆز بێت

لە مێژووی گەلاندا هەندێک ڕووداو هەن کە دواجار دەبنە سمبوڵ و هێمای بوونی مێژوویی ئەوان، نەورۆزیش لە بوونی مێژوویی ئێمەدا یەکێکە لەو ڕووداوانە، نەورۆز لەسەر بنەمای تێکۆشان دژی چەوسانەوەو ژێردەستی هاتۆتە گۆڕێ، لە دژی زوڵم و زۆر و داگیرکاریی و کۆیلایەتی بۆتە ئەستێرەی ئاسمانی ئازادی و ڕزگاریی.

لە پرۆسەی درێژی تێکۆشاندا، خەڵک سەرکەوتنەکانی خۆیان وەک دەستکەوت ئەهێڵنەوەو ئەیکەنە سومبوڵێکی شادی، نەورۆز بە هێمای ئاگرەوە بۆتە رووناکی ڕێی رزگاری و ئازادی، هەروەک چۆن نەورۆز بۆ خەڵکی کورد بۆتە نمونەی تێکۆشان و سەرکەوتن، بە هەمان ناوەرۆکی شۆڕشگێڕیەوە بووە بە جەژنی زۆرێک لە خەڵکی رۆژاوای ئاسیا.

هەمیشە دەسەڵاتداران ئەو جەژنانەیان لە خەڵک قەدەغە کردووە کە پڕ ناوەرۆکن و بوون بە سومبوڵی تێکۆشان لەدژی ژێردەستی، کۆت و بەندیان لەسەر داناون، ئەوانەش کە پیرۆزیان کردوون، بە خائین و دوژمن ناوزەدیان کردوون.

دەوڵەتی ئێران هەرچەند بە فەرمی یادی نەورۆز ئەکاتەوە، بەڵام کاتێک خەڵکی کورد ئاهەنگی نەورۆز ئەگێڕن، هێرش ئەکەنە سەریان و لێیان قەدەغە ئەکەن، رژێمی بەعسی ئێراقیش هەمان ڕەفتاری ئەکرد و نەیئەهێشت خەڵک بەدڵی خۆیان ئاهەنگی نەورۆز بگێڕن، رژێمی بەعسی سوریاش بە هەمانشێوە سەبارەت بە نەورۆز درێژەپێدەری هەمان سیاسەتی نەیارانە بووە، لە ناو دەوڵەتانی داگیرکەردا، هەرە نەیاری نەورۆز دەوڵەتی تورکیا بوو، هەتا ساڵی ٢٠١٠ ش تورکیا زۆر بە توندی قەدەغەی خستبووە سەر نەورۆز، نەورۆزی وەک جەژنی تورکەکانی ئاسیای ناوەڕاست ئەناساند، بەڵام رێگای نەئەدا کە کوردان نەورۆز پیرۆز بکەن، ئەمەش لەبەر ئەوەبوو کە کوردو کوردستانیان ئاهەنگی نەورۆزیان بە ناوەرۆکی خۆیەوەو بە ئامانجی ئازادی و ڕزگاریی ئەگێڕا.

ئێستا خەڵکی کوردستان و هاوسەنگەرانیان، بە رەنجی خۆیان نەورۆزیان سەپاندووە، لە سەرانسەری کوردستان و هەندەران بە هەمان ناوەرۆکە شۆڕشگێڕی و ئازادیخوازیەکەیەوە، بە شادییەکی زۆرەوە ئاهەنگی نەورۆز ئەگێڕن، خەڵکی کوردستان بە تێکۆشانی ڕەوای خۆی ملی بە داگیرکەران کەچ کرد کە ئیتر ناتوانن نەورۆزی لێ قەدەغە بکەن، کوردان لە هەر جێیەک، لە شارو گوند و زیندانیشدا نەورۆزیان کردۆتە سەنگەری خەباتی ئازادی و رزگاری.

ئەمڕۆ ئاگری نەورۆز لە هەموو کوردستاندا گەشاوە ترە، لە باشوورو رۆژاوا بە فەرمی ئاهەنگ ئەگێڕن، لە رۆژهەڵات و باکوریش وەک سەنگەری تێکۆشان یاد ئەکرێتەوەو بەردەوام گڕو بڵێسەی بڵندتر ئەبێت.

یەکێکی تر لە هێما گرنگەکانی نەورۆز، نەتەوەییبوونیەتی، نەورۆز جەژنێکی میللی و نەتەوەییە، نەورۆز باوەشی بۆ هەموو لایەکی کۆمەڵگە کراوەتەوە، پێویستە نەورۆز لەم رۆژە دژوارانەی خەباتدا ئەو لایەنە گرنگەی خۆی پەراوێز نەخات و پێشی بخات، پێویستە نەورۆز ببێتە ئەو هێمایەی کە ئیتر داگیرکەران نەتوانن درز بخەنە ناو بزاڤە نەتەوەیی و رزگاریخوازەکانی کوردستانەوە.

هەروەک هەموو خەڵکی دنیا، ئێمەش ئەمساڵ لە دۆخێکی ناهەمواردا نەورۆز پیرۆز ئەکەین، ماوەیەکە رۆژەڤی سەرەکیی دنیا پەتای کرۆنایە، ئەم پەتایە بەداخەوە سەرانسەری وڵاتی ئێمەشی گرتۆتەوە، ئێمەش وەک هەموو دنیا پێویستە ئامادەکاریی و رێی و شوێنی خۆپاراستنمان لە بەرامبەریدا هەبێت، ئەگەر چی لەبەر ئەو هۆکارەش ئەمساڵ ناتوانین وەک سالانی پێشوو ئاهانگ و بۆنەی نەورۆز بە فراوانی بەڕێوە ببەین، لێ بە هەمان رۆحی بەرخۆدان نەورۆز لە هەموو گەلی کوردستان و ئازادیخوازانی دنیا پیرۆز ئەکەین.

لەم قۆناغە گرنگەی خەباتی رزگاریدا، پێویستە نەورۆز ببێتە مەشخەڵی رووناکی بۆ یەکڕیزی و هەماهەنگی تێکۆشانی خەڵکی کوردستان.

کۆنگرەی نەتەوەیی کوردستان بەم بیروباوەڕەوە نەورۆز لە تەواوی کوردو کوردستانیان پیرۆز ئەکات.

با نەورۆزی ئەمساڵی ٢٠٢٠ ببێتە سەنگەری تەبایی و هەماهەنگی ناوخۆیی و سەرکەوتنی زیاتر.

نەورۆزتان پیرۆزبێت!

کۆنسەی بەڕێوەبەریی کۆنگرەی نەتەوەیی کوردستان – ك.ن.ك

وەشانی ڕاستەوخۆ