پژاک: ڕژیم ژینگەی تێکداوە و لە هەمو جوڵەیەکی کۆمەڵگا ئەترسێ

پارتی ژیانی ئازادی کوردستان پژاک لە هەڵسەنگاندی ساڵی ١٣٩٨ ی هەتاوی ئاماژەی بە سیاسەتەکانی ڕژیم لە بواری بەڕیوەبەری و تێکدانی ژینگە کردوە و بە وردی تیشکی خستوەتە سەر چەواشەکاری و چەوتیەکانی ئەو ڕژیمە و ئەنجامگیری کردوە کە کات کاتی تێپەڕاندنی ئەو دەسەڵاتەیە

لە بەردەوامی هەڵسەنگاندنەکانی پژاک دا هاتوە:ساڵی ١٣٩٨ی هەتاوی بۆ ڕژیمی ئێران ساڵێکی پڕ لە هەورازونەشێو بوو. ئەو ڕژیمە کە چڵ ساڵ بەسەر ده‌سه‌ڵاتداریەتیدا تێدەپه‌ڕێ، بەردەوام هەوڵ دەدات كه ده‌یه‌ی پێنجه‌مینی ده‌سه‌ڵاتەکەی وەکوو دەیەی سه‌قامگیری پێگەکانی خۆی نیشان بدات. بەردەوام بانگەشەی ئەوە دەکەن کە لە ژێر رێنوێنی و جیهان بینیەکانی وەلایەتی فەقیدا ئەزموونێکی سەرکەوتوانەیان لە رێوەبەری دینی پیشانی جیهان داوە.
لە ڕاستیدا ڕژیم ئاوڕ لە چوار دەیەی رابوردوی خۆی ناداتەوە و بەردەوام شکەست و کەم وکورتیەکانی دەخاتە ئەستوی بێگانە و هێزە دەرکیەکان، دەسەڵاتدارانی ڕژیم کە خۆیان مەترسی بوون لە سەر دیموکراتیزە کردنی کۆمەڵگا بەردەوام باس لە تێئوری پیلانگێڕی دەکەن و بەوجۆرە بەرپرسیارەتیەکان لە خۆیان دور دەخەنەوە.
ڕژیم کە بەرنامەی بەڕیوەبردنی دادپەروەرانەی نیە و خۆی لە هەمبەر گەلانی ئێرانا بە برپرسیار نازانێ خەریکی هێندێ پلانداڕشتنە کە سه‌رله‌نوێ ئیمپراتۆریه‌تی سه‌فه‌وی بنیات بنێتەوە و بۆ کەمکردنەوەی كاریگه‌ری گه‌مارۆكان ‌كه‌ڵك له‌ جوگرافیای كه‌لتووری ئێرانی كۆن وەرگرێ‌، هه‌روه‌ها له‌ هه‌وڵی پێكه‌وه‌نانی رێكخستنێكی پاراستنی_ جه‌ماوه‌ری له‌ ئاست ناوچه‌كه دایه‌‌ له‌ پێناوه‌ ئاماده‌كاری بۆ دژكرده‌وه‌ی خێرا له‌ به‌رامبه‌ر ته‌كنۆلۆژیای به‌هێز و پێشكه‌وتووی رۆژئاوا له‌ ڕه‌هه‌ندی نیزامیدا.

لە درێژەی شیکردنەوەکانی پژاک لەسەر ڕژیم هاتوە:ڕژیم بەردەوام هەوڵی داوە کۆمەڵگا بكاتە دوو به‌شی خۆمانی و بێگانه(خودی و غیرخودی). ئەوانەی لە چوارچێوەی سیستەمدا دەسووڕێنەوە و له‌ناو بەسیج و سوپادا بەرێکخستن کراون، خودی و ئەو بەشەی کۆمەڵگا کە هەوڵی داوە له‌دەرەوەی دەسەڵات و لە چوارچێوەی رێكخراوه‌ مەدەنیەکان سەربەخۆیی خۆی بپارێزێت، بێگانەکانن.
ساڵی ڕابوردوو، لافاوێكی گه‌وره زۆرێك له‌ پارێزگاكانی ئێرانی گرته‌وه.هەڵس و کەوتی کاربەدستانی ڕژیم ئەو ڕاستیەی نیشاندا کە بەرانبەر بە کۆمەڵگا ناکارامە، بێ بەرنامە، نابەرپرس و خەمساردن .خۆیان هاوکاریان بە گەلانی لێقەوماو نەگەیاند و ئاسته‌نگی و له‌مپه‌ریان له‌ به‌رده‌رم هاوكاری و به‌ هاناوه‌ چوونی گه‌لانیشدا دروست کرد.

پژاک تیشکی خستوەتە سەر سیستەمی دژە ژینگەیی ڕژیم لە پێناو بەرژەوەندیەکانی خۆیدا و نوسیویە:به‌بێ لە بەرچاو گرتنی لێكه‌وته‌كان، به‌شێوازێكی به‌ربڵاو و بێ به‌رنامه‌، سامانە سروشتیەکان به‌كارهێندراون. نموونەی ئه‌مه‌ش؛ سڕینەوەی دارستانەکانی باکوور و درووست کردنی رێگاوبان و ویلاکانە. هەروەها ئەوبەنداوانەی کە لەسەر رووبارەکان بەستران، ئێکۆسیستەمی جۆگرافیای ئێرانی تووشی ئاڵۆزییێکی گەورە کردووە کە هه‌نووكه‌ شاهیدی به‌شێك له‌ ئه‌نجامه‌كانی هه‌ین بۆ وێنه‌؛ وشک بوونی دەریاچەی ورمێ و خۆڵ بارین لە پارێزگاکانی رۆژئاوای ئێران و هەروەها روودانی ئه‌و لافاوانە کە سەرەتای ساڵی پار رویان دا. دەبێ بزانین کە یەک لە هۆکاره‌كانی زیان لێکەوتوویی لە ڕادەبەده‌ری ئەو رووداوە سروشتیانە، ده‌گه‌ڕێته‌وه‌ بۆ چۆنیەتی ئەندازیاری و نه‌گرتنه‌به‌ری رێوشوێنی پێویست له‌ درووست کردنی جادەوبان و بەنداوەکان. زۆرێک لەو بەنداوانە بوونە هۆکاری لادانی چەمەکان لە رێڕەوەی بنگەیی و ئاسایی خۆیان.

پژاک سیاسەتی سەرکوتکاری چالاکانی کۆمەڵگای رژیمی ڕەخنە کردوە و رایگەیاندوە: ڕژیم لە هەموو جۆرە جوڵە و ڕیکخستنبونێکی کۆمەڵگا دەترسێ. بۆیە گرینگە گەلانی ئێران خۆیان لێک نێزیک بکەنەوە و ڕیکخستنەکانیان تۆکمە بکەن چونکە کات کاتی تێپەڕاندنی ڕژیمی حاکم بەسەر گەلان دایە.

پژاک لە بەشیکیتری هەڵسەنگاندەکانیدا ئاوڕی لە هەڵویست و بەرپرسیارەتی نەتەوەی و دیموکراتیکی گەلانی ئێران و رۆژهەڵاتی کوردستان داوەتەوە وڕایگەیاندوە کە ئەو یەکە نیشانەی وەرچەرخانی گەورەیە لە روحی بەرەنگابونەی گەلان دژی داگیرکاری.

سەبارەت بە هەڵویستی گەلان بە گەشتی گەلی کورد لە رۆژهەڵاتی کوردستان دژ بە داگیرکاریەکانی ڕژیمی تورکیە لە ڕۆژاوای کوردستان، باکور ورۆژهەڵاتی سوریە پژاک بەمجۆرەی نوسیوە: لە سەرەتاکانی پاییزی ساڵی رابردوو، دوای هێرشی دەوڵەتی داگیرکەری تورکیە بۆ سەرێکانی و رۆژهەڵاتی چەمی فۆرات، گەلی رۆژهەڵاتی كوردستان لە بەرامبەر ئەو هێرشکاریە ڕژانە سەر شەقام. هاوکات زۆرێک لە کەسایەتی رووناکبیر، نووسەر، هونه‌رمه‌ند و چالاکانی مەدەنی دژی ئەم داگیرکەریەی دەوڵەتی تورکیە هەڵوێستیان نواند و پشتیوانی خۆیان لە رۆژئاوا نیشان دا. ئەم هەڵوێستە لە ڕاستیدا وەرچەرخانێکی مەزن بوو لە شێوازی بەرهەڵستکاری گەلی کورد و گەلانی ئێران. هه‌روه‌ها، كاریگه‌ری هه‌ڵوێست و چالاكییه‌كانی ئه‌مریكا و هێزه‌ هژمۆنیك خوازه‌ جیهانیه‌كان له‌ میانه‌ی رووداوه‌كانی سه‌رێكانی و گرێسپی بوو به‌ هۆكاری گۆڕانی روانگه‌ و چاوه‌ڕوانی گه‌ل سه‌باره‌ت به‌ هاوكاری و پشتیوانی هێزه‌ ده‌ره‌كییه‌كان سه‌باره‌ت به‌ گۆڕینی ده‌سه‌ڵات له‌ ئێران. واتا جۆره‌یه‌ك له‌ نه‌مانی متمانه به‌‌م هێزانه‌ له‌ رای گشتی كۆمه‌ڵگای ئێران هاته‌ ئاراوه‌ و تا ده‌چێ بیرۆكه‌ و ئیراده‌یه‌كی تۆكمه‌تر‌ بۆ تێكۆشان له‌ به‌رامبه‌ر رژێمی داگیركه‌ری ئێراندا پێكدێت كه‌ پشت به‌ستن به‌‌ هێزی گه‌وهه‌ری كۆمه‌ڵگا و گه‌لانە.‌‌

پژاک گەمارۆکانی سەر ڕژیمی ورد کردوەتەوە و نوسیویە:دوای هه‌ڵوه‌شاندنه‌وه‌ی رێكه‌وتننامه‌ی “به‌رجام” ئابڵۆقه‌ ئابوورییه‌كان له‌ سه‌ر ئێران زۆرتر و چڕتر بوونه‌‌ته‌وه‌، چه‌نده‌ش رژێم هه‌وڵی دا ئه‌م گه‌مارۆیانه‌‌ نه‌دیتوو بگرێ، به‌ڵام ڕۆژ له‌دوای رۆژ ده‌ركه‌وت كه‌‌ ته‌نگیان پێهه‌ڵچنیوه.
دیارە گەمارۆکان تەنیا ڕژیمی تەنگەتاو نەکردوە بەڵکۆ گوشارەکانی لەسەر چین وتۆێژژەکانی کۆمەڵگاش زیاد کردوە و برسیەتی گەیاندوەتە ئاستێکی مەترسیدار.‌

پژاک باسی لە ناڕيزایەتیەکانی گەلان کردوە و شیکردوەتە کە:ئه‌گه‌ر پێشتر داخوازییه‌كان زیاتر ره‌نگ و بۆی سیاسیان هه‌بوو و هه‌وڵدانه‌كان بۆ ئازادی راده‌ڕبڕین و به واتایێكی دیكه هزریبوون، به‌ڵام ئه‌م یه‌ك دوو ساڵه‌ی دوایی‌ به‌لاواز بوونی دۆخی ئابووری، ناڕه‌زایه‌تیه‌كان ره‌هه‌ندی زیاتری به‌خۆه‌گرتووه‌ و به‌رفه‌راوانتر بوون و هه‌موو چین و توێژه‌‌كانی كۆمه‌ڵگای له‌خۆ گرتووه‌. چینی خواره‌وه‌ی كۆمه‌ڵگا كه‌ زۆرترین به‌شی كۆمه‌ڵگای ئێران پێك دێنێ، برسیه‌ و شه‌ڕی مان و نه‌مان ده‌كات

لە بەشیکیتری هەڵسەنگاندنی پژاک دا هاتوە:رژێمی داگیرکەری ئێران بێ له‌ به‌رچاو گرتنی به‌رژه‌وه‌ندییه‌كانی گه‌لانی ئێران، به‌رده‌وام له‌ روانگه‌یێكی ته‌سكی ئایدیۆلۆژیكیدا سه‌یری ده‌ره‌وه‌ و ناوه‌وه‌ی كردووه‌ كه‌ ئه‌و ئایدیۆلۆژیه‌یش ته‌نیا به‌رژه‌وه‌ندی تاقمێكی بچووكی بازنه‌ی ده‌سه‌ڵاتی پاراستووه‌. به‌م جۆره‌ رێگای بۆ هه‌رچه‌شنه‌ فرتوفێڵ، درۆ و ریا كردووه‌ته‌وه‌. سه‌ره‌ڕای ئه‌م دۆخه‌ش، چین و توێژه‌ جیاوازه‌كانی كۆمه‌ڵگا، لایه‌نه‌ دیمۆكراسیخوازه‌كان، چالاكانی مه‌ده‌نی و ژینگه‌پارێز ده‌ستیان له‌ تێكۆشان هه‌ڵنه‌گرتووه‌ و هه‌روه‌ها به‌رده‌وامن له‌ تێكۆشان و به‌رخۆدان. ئه‌م ڕه‌وته‌ش بۆته‌ هۆی ئه‌وه‌ی كه‌ ڕژێم به‌ توندی هه‌ڵوێست نیشان بدات و له‌م پێناوه‌شدا له‌ ساڵی رابردوو شاهیدی شاڵاوی گرتن و زیندانی كردنی چالاكانی مه‌ده‌نی و سیاسی به‌تایبه‌ت ژنان و خوێندكاران بووین.پێویستە بە هاوخەباتی و بە چڕکردنەوەی ناڕەزایەتیەکان ئەم ڕژیمە تێپەڕێنین و ئەوەش تەنیا بە یەک ڕەهەند نابێ و دەبێ لە ڕیگا و ڕیبازی جیا جیا کەڵک وەرگیردرێ.

وەشانی ڕاستەوخۆ