پارتی سەوز و ڕێکخراوی جیهانی کورد هێرشەکانی سەر باشور شەرمەزار دەکەن

پارتی سەوزی کوردستان، ڕایدەگەیەنێت، بەهۆی هێرشەکانی دەوڵەتی تورکەوە، ژینگە و سروشتی کوردستان لەو ناوچانە تێکچووە و پیسبووە، هەروەها نائارامییان دروستکردووە، ڕێکخراوی جیهانی کوردیش داوا لە ڕیکخراوە جیهانییەکان دەکات کار بۆ ڕاگرتنی هێرشەکانی تورکیا و ئێران بکەن.


بەپێی بەیاننامەیەکی پارتی سەوزی کوردستان، ئەو هێرشه زەمینیەی توركیا کە بۆسەر ناوچەی حەفتانین له زاخۆ دەستیپێکردووە، بۆتەهۆی سوتاندنی سەدان دۆنم لە پوش و پاوان و ڕەز و باخی هاوڵاتیان و زەرەر و زیانێكی ماددی زۆریان لە جوتیاران داوە و بۆتەهۆی شێواندنی سروشت و پیسکردنی ژینگەی کوردستان و دروستکردنی نائارامی تیایدا.

ئەو ڕێکخراوە ژینگەییە هەروەها دەڵێت، “لە سۆنگەی بەرپرسیاریتی و هەستکردنمان بە پاراستنی سەرو ماڵی هاوڵاتیان، ژینگە و خاکی پیرۆزی کوردستان نیگەرانین و ئیدانەی  ئەو زنجیرە هێرشە دوژمنكاریانەی فڕۆکەكانی تورکیا و ئێران دەکەین بۆسەر خاکی عێراق و کوردستان بە بیانوی بوونی گەریلاکانی پەکەکە لە چەند ناوچەیەکی وەک “دانیشتوانی کەمپی مەخمور، شەنگال، سیسێنێ، خواکورک، سەرگەلی هەرێمی قەندیل و گۆرەپانی شەهیدان”.

ڕێکخراوەکە دەشڵیت: ئەم هێرشانەی ئێران و تورکیا پێشێلکردنێکی ئاشکرای یاسا نێودەوڵاتیەکانە، داواش لە حکومەت و کاربەدەستانی باشوور دەکات، بە زووترین کات بێنە دەنگ لەسەر ئەو هێرش و په لاماره نامرۆڤانانە و ڕێگا چارەیەکی گونجاو بدۆزنەوە بۆ وەستاندنی دەستبەجێی ئەو هێرشانه.

هەر لەو چوارچێوەیەدا ڕێکخراوی جیهانی کورد، هەر چەشنە دەستدرێژی و هێرشێک بۆسەر خاکی کوردستان و گەلی کورد، بەتوندی ئیدانە دەکات و داوا لە تەواوی ڕێکخراوە پەیوەندیدارەکان بە تایبەت نەتەوە یەکگرتووەکان و ڕێکخراوەکانی مافی مرۆڤ دەکات، هەرچی زووترە هەنگاوی کردەیی و بەجێ بنێن بۆ ڕاگرتن و دووبارە نەبوونەوەی ئەو تاوان و دەستدرێژییە ئاشکرایانە.

وەشانی ڕاستەوخۆ