بە پێی زانیارییەکان، بەهۆی بارینی بە خوڕی باران و هاتنی سێڵاو لە باکووری کوردستان لانیکەم ٥ خۆوڵاتی کوژران و چەندین هاوولاتیش برینداربوون.
میدیا خۆجێیەکانی باکووری کوردستان دەڵێن لە پاریزگای باتمان ٤ هاوڵاتی و لە پارێزگای ئامەدیش ٢ هاوڵاتی کەوتوونەتە ناو ئاو و خنکاون. ڕاپۆڕتەکان باس لەوەش دەکەن کە دەیان هاولاتیش برینداربوون و گەیەندراونەتە ناوەندە پزیشکییەکان.
هەروەها دەگوترێت کە ژمارەیەکی زۆری مەڕ و ماڵاتی گوندنشینان مردار بوونەتەوە و سەدان ماڵ و بیناش زیانیان بەرکەوتووە.
هاوڵاتیانی باکووری کوردستان، لە تۆڕە کۆمەڵایەتییەکان وێنەی باران بارین و سێڵاوەکەیان بڵاوکردووەتەوە و ڕەخنەیان ئاراستەی شارەدارە خۆسەپێنەکانی سەر بە دەسەڵاتی ئاکەپە مەهەپە کردووە.
ئەگەرچی لە ئەنجامی پڕۆسەی هەڵبژاردن‌دا کورسی شارەوانی لە زۆربەی شارەکانی دوو پارێزگای ئامەد و باتمان کەوتنە دەستی پارتە کوردییەکان، بەڵام دواتر ڕژیمی تورکیا بە بیانووی جیاواز شارەوانە هەڵبژێردراوەکانیان لە ئەرکەکانیان هەڵپەسارد و دۆسیەیان لە دادگا لەدژیان کردنەوە و لە جێگای ئەوان "قەیوم"یان بەسەر شارەکاندا سەپاند.
هەروەها لە باشووری کوردستانیش چەند ناوچەیەک، وەک هەولێر بە هۆی باران بارینەوە تووشی لافاو بوون. دەگوترێت کە ژمارەیەک لە دانیشتووانی گەرەکە کۆن و هەژارنشینەکانی شاری هەولێر تووشی زەرەر و زیان‌بوون.