گەریلایەیل ئازادی کوردستان وە بونەی ٤٥مین ساڵیاد دامەرزیان پارت کارگەرەیل کورستان-پەکەکە لە هەرێمەیل زاپ و مەتینا ئۆپراسیون شووڕشگەڕانە دەسوەپێ کرد و زەربەری قورس لە ئەرتش داگیرکەر تورکیە وەشانن.

ناوەند خەوەرڕەسانی و چاپەمەنی هێزەیل پاراستن گەل، هەپەگە، لە دو بەیانیەی جیاجیا باس ئۆپراسیون شووڕشگەرانەی گەریلایەیل ئازادی کوردستان وە پێشەنگایەتی هێزەیل یژئاستار لە زاپ و مەتینا کردیە و وەتیە: ئی ئۆپراسیونەیلە ڕووژ ٢٠ نوڤامبر ئەڕا پێشوازی لە ٤٥مین ساڵیاد دامەرزیان پارت کارگەرەیل کوردستان پەکە ئەنجام گردیە.

لەبەیانیەگەی هەپەگە هاتیە: گەریلایەیل ئازادی کورستان ئەڕا سڵام کردن لە هەڵمەت ئازادی ئەڕا رێبەر ئۆجالان، لەسەر رێباز شەهیدەیل و وە رۆح سەرکەفتن عەگید و زیلانەکان دەسپێگ ٤٦مین ساڵ تێکۆشان پەکەکە ئی چآلاکیەیلە ئەنجام دانە.

هەپەگە وەتیە، گەریلایەیل لە مەیدان تەپەی ئۆرتێ لە هەریم مەتینا وە رۆحیە بەرز ئاپۆیی زەربەر قورس لە داگیرکەرەیل دانە و لە ئاکاما ١٢ داگیرکەر کوشیا، ٢ کامێرای چەودێری لەبەین بریاس و زەربە لە ٣ سەنگەر وەشیاس.

هەمان ڕووژ ، لە مەیدان بەرخوەدان ئامێدی هەرێم زاپ، گەریلایەیل ئازادی کوردستان لە ئۆپراسیۆنێگ شووڕشگەڕانە لە سێ ناوچەی جیاواز، ئەرتش داگیرکەر تورکیە کردنەسە ئامانج.

لەی چالاکیەیلە ٤٩ نزامی داگیرکەر تورکیە کوشیاس، ١٢ چادور و سەرنگەر نزامیش لەبەین بریاس.

ناوەند خەورڕەسانی و چاپەمەنی هەپەگە لە بەیانیەگەی ئاماژە کردیە، لە ئۆپراسیون شووڕشگەڕی لە زاپ و مەتینا گەریلایەیل عەگید، جوان و ئاندوک وە قارەمانی تا ئاخرین هەناسە شەڕ کردنە و پەیوست بینەسە کاروان نەمرەیل.