ئیمڕوژ هەشتمین ساڵڕوژ ترور ئەندام پارت ژیان ئازاد کوردستان پژاک "کەماڵ شێخ سادە و وڵاتپارێز کورد سدیق سالی ئاوایی" لە شارسان پێنجوین باشوور کوردستانە.
کۆمیتەی شەهیدەیل پژاکیش لە ئی وارە داخویانێگ بڵاو کردیە و وەتیە: ئاماجەیل شەهیدەیل کەماڵ و سدیق وە دی تێریم
هەشت ساڵ وەرجە ئیسە لە ڕووژ ١٣ ئاپریل سال ٢٠١٦ ئەندام پارت ژیان ئازاد کوردستان، پژاک کەمال شێخ سادە، یا کەماڵ پێنجوێنی و وڵاتپارێز کورد وستا سدیق ساڵیئاوایی لە شارسان پێنجوین باشوور کوردستان لە لایەن کەسەیل نەناس ڕفیان.
دویاتر و لە شوون چەن ساعەت جنازەیل کەمال شێخ سادە و سدیق سالی ئاوایی لە ٢ شوون جیاجیا پەیا کریا و ئەڕا پزشک قانونی شار سلێمانی هەناریا. ڕووژێگ دویاتر وە مەراسمێک لە شارسان پێنجوین وە بەشداری خەڵک سپاریانە خاک.
شەهید کەماڵ و شەهید سدیق خەڵک شارسان پێنجوین باشوور کوردستان بین.
کەمال پێنجوینی لە ناو پژاک چالاکانە دژ وە داگیرکەرەیل کوردستان خەبات و موبارزە کرد. وەخاتر چالاک بیێنێ لە ناو ڕز تێکوشانەکان جمشت ئازادی، چەندین جار لە لایەن هێز و جیرەخوەرەیل ڕژیم ئێران هەڕەشەی کوشتن وەلێ کریا و تەنانەت یەک جاریش تەقە وەلێ کریا.
هەمان ڕووژ ئاسایش پێنجوین دو کەس خەڵک روژهەڵات کوردستان وە ناوەیل" سینا رەشیدی و مەسعود مەجیدی " وە تومەت ترور کردن دەسگیر کرد، ئەو دو کەسە ئعتراف وە ئەنجام دان تاوانەگە کردن و لە شوونێ دادگا بریار سێدارە ئەڕایان دەرکرد.
هەرچەن راسەوراس رژیم ئیران وە پشتیوان ئەو دو کەسە تاوانبار کریا، ئەمانێ دادگا و هێزەیل ئەمنیەتی هویچ کارێگ نەکردن و تەنانەت لە ژێر فشارەکان رژیم ئێران تەقالا کریا ئەوە وە موشکل شەخسی ناو بنریەد، ئیسەیش ئەو دوکەسە لە زندانن.
ئێسە و لە شوون گوزەریان ٨ ساڵ لەو ترورە ئاشکار نەکریاس، چە پارت و لایەنێک لە پشت ترور کەماڵ شێخ سادە و سدیق ساڵیئاوایی بینە.
لە هەشتمین ساڵڕووژ ئی ترۆرە، کۆمیتەی شەهیدەیل پژاک لە داخویانێگ ئعلام کرد: هەڤاڵ کەماڵ وە ئرادەی بەرزێ وە موبارزەی خەڵقێ پابەند بی، و فەلسەفەی ئازادیخوازی وە خاسی لە ڕێبەر ئاپۆ فێر بیوی. وە دەرک دورسێگ ک لە پارادایم ڕێبەر ئاپۆ داشت، ئەڕا ئازادی خەڵقێ لە هویچ فەداکاریێگ درێخ نەکرد.هەڤاڵ کەماڵ وە فکر و روح، کردار و قسەی خوەی لە رێ موبارزەیلێ وە حەقیقەت ئنقڵابی ڕەسیوی، لە ئی سویکەو وە موبارزەی ئازادیخوازی لە هەر چوار بەش کوردستان باوەر داشت. وە ناسین کافی لە جمشت ئاپۆیی، دەسوە گووڕانکاری لە ڕی ژیان خوەی دا و وە جسارەت و فەداکاری مەینەتیەیل فرەیگ کیشا و خزمەت گەورایگ وە خەلقێ کرد.
هەرلیوا لە هەڕەشەیل پەیەڵپەی دژمنەیل و موزیرەیلێ ترسێگ نەیاشت و وە ئاماج گەوراتر کردن روحیەی موبارزەیلێ ئەڕا وە دی هاوردن یەکیەتی نەتەوەیی خەڵق کورد فرەتر لە جاران چالاکی کرد.
لە درێژەی داخویانیەگە هاتیە: هەڤاڵەیل کەماڵ و سدیق ساڵیاوایی لە ناوچەی پێنجوین بوینە نماد موبارزە ئەڕا خەڵق کورد و وە بێ هویچ چەو ئنتزاریگ چالاکیەیل خوەیان ئەنجام دان، دژمن ک تاقەت ئی ڕەوشە نەیاش دەس وە تەوتەئەیگ ئەڕا شەهید کردنیان دا. هەر دو هەڤاڵ وە سەداقەت و دورسی وە موبارزەیل پژاک پابەند بین و عشق وە ئازادی خەڵق سەرلەوحەی موبارزەیلیان بی.
کۆمیتەی شەهیدەیل پژاک لە ئاخر داخویانی وە هاوردنە ویر موبارزەی دو شەهید ئعلام کردیە: پژاک ئەڕا وەدیهاوردن ئاماجەیل ئازادیخوازانەی شەهیدەیل کەماڵ و سدیق، موبارزەیلێ فرەتر لە جاران وەفراوانتر کەید.