بریتانیا، فەرانسە و ئاڵمان وردەکاری ژێرپاخستن ڕژیم ئێران لە ڕێکەفتننامەی بەرجام ئاشکرا کردن
سێ وڵات زلهێز ئرووپایی بریتانیا، فەرانسە و ئاڵمان سەربار ئاماژەدان وە فرەوبیێن غەنیسازی ئۆرانیۆم لە لایە ڕژیم ئسلامی ئێران و ژێرپاخستن ڕێکەفتننامەی بەرجام، نگرانی خوەیان لەبارەی بەرنامەی هەستەیی ئێران نیشاندانە.
ئامریکایش تەکید کردیە لە پاڵ هاوپەیمانەیل ئرووپایی خوەی ئەڕا کۆنترۆل کردن ئێران وسێد.
ئاژانس رۆیترز لە گوزارشیگ ئعلام کردیە ک سێ وڵات ئرووپایی ئەندام بەرجام یانی، بریتانیا، فەرانسە و ئاڵ،مان لە نامەگەیان وە شەورای ئەمنیەت سازمان نەتەوەیل یەکگردێ ، وردەکاری ژیرپاخستن ڕژیم ئێران لە ڕێکەفتنامەی بەرجام ئاشکرا کردنە.
ئی وڵاتەیلە لە نامەگەیان سەربار ئاماژەدان وە گوزارش ئاخر ئاژانس ناودەوڵەتی ئنرژی ئەتۆمی، گەشەدان وە بەرنامەی ئەتۆمی ئێران لەوانە، فرەوەبیێن زەخیرە و ئاست غەنیسازی ئۆرانیۆم وە ژێرپاخستن بەرجام زانستنە.
هەر چەند ئی ٣ وڵات ئرووپاییە لە نامە هاوبەشەگەیان، هەڕەشە جێوەجێ کریان مکانیزم ماشە نەکردنە، ئەمانێ وە تەمامبیێن بڕیارنامەی ٢٢٣١ لە مانگ رەزبەر ساڵ ١٤٠٤ ئاماژە کریاس.
بڕیارنامەی ٢٢٣١ شەورای ئەمنیەت ، ئمکان هەڵەوگەردانن دەسوەجێ تەحریمەیل شەورای ئەمنیەت لە سەر ئێران تا وەرجە مانگ رەزبەر ساڵ بانان وە وڵاتەیل دەید.
لە لای ترەگ مەتیو میلر قسەکەر وزارەت دەرەوەی ئامریکا ئاماژە کردیەسە بڕیارنامەی ئاژانس ناودەوڵەتی ئنرژی ئەتۆمی لە بارەی بەرنامەی هەسەیی ئیران و وەتیە، ئامریکا وە هاوکاری وەگەرد هاوپەیمانەیل ئرووپایی خوەی ئەڕا وەدەسهاوردن ڕێ چارەسەری لە بارەی بەرنامەی هەستەیی تەیران ئدامە دەید.