کۆمیتەی ئکۆلۆژی پارت ژیان ئازاد کوردستان پەژاک وە بڵاو کردن بانگەوازیگ، وە مدوو ئاگرکەفتنەوەیل پاوە و جوانڕۆ، وەتیە: کوشانن ئاگر تەنیا ئەرک ژینگە دوسەیل نیە و بەلکێ گشت بەشەیل کوومەڵگە هەوەجەس خوەیان سازماندەهی بکەن و هەمبەستەگیان هازدارتر بکەن تا بتوانن رویوەروی ئاگرکەفتنەوەیل بن.
کۆمیتەی ئکۆلۆژی پارت ژیان ئازاد کوردستان پەژاک لە بانگەوازەگەی ئعلام کردیە: وە هاتن تاوسان، کەڕەتێ ترەگ دارسان و سروشت لە ڕووژهەڵات کوردستان ئاگر گرێد ک مەمەرەیل جێ گومانێگ لە ئەوە دەس دێرێد، وە ئی مدووە هەوەجە وە خوەی ڕێکخستن کردن خەڵقی ئەڕا کونترول ئاگرکەفتنەوەگە و پارێزوانی لە ژینگەس. زوورم ئی ئاگر کەفتنەوەیلە وە مدوو نووڕین ئەمنیەتی نزام نابودگەر ئێران رویدەید ک هەوەجەس وە بەرتەک مەردمی نوای ئەوانە بگریەد.
پەژاک وە ئاماژە کردن وە ئاگرکەفتنەوەیل زەنجیروار لە ناو جەن ڕووژ وەرین لە پاوە و جوانڕۆ، ئعلام کردیە: نزام دژ ئکۆلۆژی ئێران بویچکترین بایخێگ وە ئی رویداوەیلە نەیا.
کۆمیتەی ئکۆلۆژی پەژاک وە خستنەوەرباس تەقەلای سازمانەیل خەڵکی ژینگە دووس و چالاکەیل ژینگە ئەڕا کوشانن ئاگر، وەتیە: دیارە ک ئیسفای ئەمنیەتی ڕژیم و بیێن دەسەیل شاریاگ، مدوو ئاگرکەفتنەوەیل ئانقەست ساڵانەس و ئاگرکەفتنەوەی پاوە و جوانڕۆ لە هەمان چوارچوەس. ئی سیاسەتەیل و کردەوەیل ڕژیمە تەنیا وە بەرتەک نیشاندان و چالاکی بێ وچان هێزەیل مەردمی و چالاکەیل ژینگە دووس، هەلیوا پایاری بەرحەق سازمانەیل ژینگەیی مەردمی پویچەڵ کریەد.
کۆمیتەی ئکۆلۆژی پەژاک لە ئاخر داخویانی سەروار شەرمەزار کردن دەسەیل پشت ئاگرکەفتنەوەگان و کەمتەرخەمی ناوەندەیل حکومەتی، داوا لە سازمانەیل مەردمی، چالاکەیل و گشت بەشەیل خەلق کردیە ئەڕا کونترول کردن و کوشانن ئاگر تەقەلا بکەن و سازماندەهی خەڵقی خوەیان فرەتر لە هەر چشتێگ وە جوور حەقێگ دمۆکراتیک هازداری بکەن.
هەوەجەس خەلق وە بێ جەوەڕێ بیێن وە ڕژیم ک خوەی مەمەر کاولکاری ژینگەس، دەسوەکار بن، چویگە سەرەکی ترین ڕێ ئەڕا رویوەڕوی بیێن وەگەرد ئاگرکەفتنەوەیل دارسان و سرووشت، گەشەی خوەی سازماندەهی دمۆکراتیک خەڵقی و هازدار کردن هەمبەستگیە.