كۆمیتەی ڕاگەیاندنی پارتی ژیانی ئازادیی كوردستان، پەژاک، سەبارەت بە هێرشەکەی دوێنێی دەوڵەتی تورکی داگیرکەرى تورکیا کە لە ڕێگەی درۆنەوە لە نزیک سەید سادق ئەنجامی دا و بەهۆیەوە دوو ڕۆژنامەنووس بە ناوەکانی هێرۆ بەهادین و گوڵستان تارا شەهیدبوون ڕاگەیەندراوێکی بڵاوکردەوە.

دەقی راگەیاندنراوەکەی کۆمیتەی راگەیاندنی پەژاک بەم جۆرەیە:

دەوڵەتی داگیركەری تورك بەشێوەیەكی وەحشیانە و نامرۆڤانە و فاشیستانە و دیكتاتۆریانە پەلاماری هەموو نرخ و بەها كۆمەڵایەتییەكانی گەلەكەمان لە هەموو بەشەکانی کوردستان دەدات و سڵ لەهیچ یاسا و ڕێسا و بەهایەكی مرۆڤی ناكاتەوە، ئەو دەوڵەتە داگیركارە بێ پسانەوە، بەشەو و ڕۆژ لە ئاسمان و زەوییەوە پەلاماری سەر گەریلاكانی ئازادیی كوردستان، شەرڤانانی ئازادیی رۆژئاوای كوردستان و یەكینەكانی پاراستنی ئێزیدیان لە شنگاڵ دەدات و لە باكووری كوردستان بەهێرش كردنە سەر شارەوانییەكان و بنپێ‌كردنی ئیرادەی گەل و بە هێرش كردنە سەر چاند و كەلتوری كوردی و پرەنسیپ و نۆرمە دیموكراتییەكان گەلەكەمان دەیەوێت گەلی كورد ملكەچی سیاسەتە شۆڤینی و دژە مرۆڤیەكانی خۆی و لەتێكۆشان و خۆڕاگری بۆ بەدەستهێنانی مافە ڕەواكانی پاشگەز بكاتەوە.

لە باشووری كوردستانیش بە ڕێگەی بنەماڵەی بارزانی و بەچاودێری و چاوساخی تۆڕێكی ئیستخباراتی و بەكرێگیراو لە ژێر چاودێری میت و پاراستندا لەلایەك دەستیان بەهەڵمەتێكی گەورەی داگیركاری خاكی باشووری كوردستان كردووە و لەلایەكی تر بەڕێگەی ئەو سیخۆر و نۆكەر و جاشۆڵكانە كەسایەتی سیاسی، ئازادیخواز، نەتەوەیی، دیموكرات و وڵاتپارێز و ڕۆژنامەنووسان و شۆڕشگێڕ تیرۆر دەكەنە.

ئامانجی هێرشی فرۆكەی شەڕكەر و بێفرۆكەوانەكان و لە ئاستی نێونەتەوەیی و دەوڵەتیدا هەوڵدەدات لەگەڵ دەوڵەتانی داگیركەری سەر كوردستان رێككەوتننامە نێودەوڵەتییەكان دژ بە گەلەكەمان زیندوو بكەنەوە و لەو پێناوەشدا ڕۆژانە ناوچە شاخاویەکانی شارباژێر دەکرێنە ئامانجی بوردوومانی فڕۆکە جەنگییە کانی دەوڵەتی فاشیستی تورکیا.

لەو هێرش و پەلامارانەی دەوڵەتی داگیركەری تورك بۆ سەر دەستكەوتەكانی گەلەكەمان بە پێی بەڵگەکان ئاشکرا دەبێ کە پەدەكە بووەتە كەوا سوری بەر لەشكەری جەندەرمەی تورك و چاوساخی و هاوكاری ڕاستەوخۆی ئەو دەوڵەتە شۆڤینی و دیكتاتۆر و هاوپەیمانی داعش دەكات و ئاسانكاری بۆ بەئامانجگرتنی گەریلاكانی ئازادی كوردستان و شەرڤانانی ئازادی و گەلەكەمان لەشنگاڵ و باشووری كوردستان و تەنانەت کەسانی ئازادیخواز و نیشتمانپەروەر دەكات.

بەهەمانشێوە بووەتە داردەستێك بەدەست ئەو دەوڵەتە ملهۆر و چەتوونە بۆ دەستبەسەرداگرتنی خاك و ئاو و هەوا و سروشتی كوردستان، تەنانەت بەوەشەوە بەس نابینێت لەرێككەوتنە نێودەوڵەتیەكانی دژ بەگەلەكەمان بووەتە هاوبەشێكی ڕاستەقینەی دەوڵەتی داگیركەری تورك و لایەکی تریشەوە خزمەتکار بە کرێگیراوی ڕژێمی داگیرکەری ئێران، ئەمەش دەچێتە چوارچێوەی خیانەتی نەتەوەیی و نیشتیمانی و هیچ پاساو و لێبوردنێكی بۆ نییە.

دەوڵەتی داگیركەر بەهۆی ئەوەی ڕاگەیاندنكارانی ڕاگەیاندنی ئازاد بەشێوەیەكی خۆبەخشانە و فیدایانە لەبەرامبەر بەهەوڵە داگیركاری و قیزەونەكانی دەوەستنەوە و سیاسەتی داگیركاری و قڕكردن و كۆمەڵكووژی سەر گەلی كورد ڕیسوا و پووچەڵ دەكەنەوە، دەكاتە ئامانجی هێرشە نامرۆڤانە و وەحشیانەكانی، بۆیە شکست و تێکچوونەکانی لەبەرەکانی شەڕدا دەیەوێت بەو کردەوانە پەردپۆش بکات.

بەئامانجگرتنی ڕۆژنامەنووسانی ئازاد كردەوەیەكی نامرۆڤانە و بێ ئەخلاقانەیە كە دژ بەهەموو پێوان و پرەنسیپە نێودەوڵەتی و بنەماكانی مافی مرۆڤ و كردەوەیەكی چەپەڵ و شەرمهێنەرە، بۆیە وەك كۆمیتەی ڕاگەیاندنی پارتی ژیانی ئازادی كوردستان”پەژاك” هێرش و پەلاماری دەوڵەتی داگیركەری تورك، و بەتایبەتی ئەو هێزە بەكرێگیراوەی بەتیرۆر و كۆشتنی ڕۆڵەكانی گەلەكەمان شاگەشكە دەبێت و پێش میتی تۆرك دەكەوێت و ڕۆژنامەنووسان “گۆڵستان تارا و هێرۆ بەهادین” دەكەنە ئامانج، بەتوندی ڕیسوا و شەرمەزار دەكەین و یادی دوو هەڤاڵی ڕۆژنامەنووسی ئازاد بەرز ڕادەگرین و پرسە و سەرەخۆشی خۆمان ئاڕاستەی کەس و کار و سەرجەم هەڤاڵان و هاوڕێیانی ڕاگەیاندنی ئازاد دەکەین و شفای چاکبوونەوەش بۆ بەرینداربووەکان دەخوازین.

ئەم كردەوەی دەوڵەتی داگیركەری تورك جارێ یەكەم و دوا جاریشی نییە، لە ٤ـی تشرینی یەکەمی ٢٠٢٢، ئەندامی ژنۆلۆژی و ئاكادیمسین و ڕۆژنامەنووس “ناگەهان ئاكارسل”بەهۆی هێرشێكی چەكداریەوە تیرۆر كرا.

لەهەمانكاتدا ٢٠ـی تشرینی دووەمی لەدێرك هەواڵسازی ئاژانسی هاوار”ئیسلام عەبدوڵڵا” شەهید كرا، لە ساڵی ٢٠٢٣ خەباتكارانی ژن تیڤی لەنێوان قامیشلۆ ـ عامۆدا كرانە ئامانج و لەوێدا “نەجمەدین فیصل حاجی” شەهید بوو، هاوكات لە ساڵی ٢٠٢٤ فرۆكە شەڕكەرەكانی دەوڵەتی تورك خەباتكاری رادیۆ چرا ئیف ئیم “مراد میرزا ئیبراهیم”یان شەهید و مەدیا حەسەن و خەلەف خدریش بریندار كرد و لەناوخۆی توركیا و باكووری كوردستاندا بەسەدان ڕۆژنامەنووس و ڕاگەیاندنكاری ئازادیان لەكۆنجی زیندانەكاندا بەند كردوە و ڕۆژانە پەلاماری ڕۆژنامەوانانی ئازاد دەدەن.

ئەم هێرشانەی دەوڵەتی تورك بۆ سەر ڕاگەیاندنی ئازاد نیشان دەدات كە دەوڵەتی داگیركەری تورك و پەدەكە چەندە لە ڕۆژنامەنووسان و ڕاگەیاندنی ئازاد دەترسن، چونكە باش دەزانن كە تاكە ڕاگەیاندن و ڕاگەیاندنكارێك دەتوانێت پەردە لە ڕووی سیاسەتە قیزەون و چەپەڵەكانیان و ئەو كردەوانەیان دژ بەكۆمەڵگە هەڵماڵێت ئەو ڕاگەیاندنكار و ڕاگەیاندنانەن كە بەدڵ و گیان لەپێناو ئازادی گەل و مرۆڤایەتی خەبات دەكەن.

دەبێت دەوڵەتی تورکیا و هێزە بەكرێگیراو و نۆكەر و چاوساخەكانی باش بزانن كە هیچ فشار و هەڕەشەیەك ناتۆانێت ڕۆژنامەنووسان لەڕێگەی ڕاستی و حەقیقەت پاشگەز و بێدەنگیان بكەن؛ چونكە ئەو ڕۆژنامەنووس و ڕاگەیاندنكارانە باش دەزانن كە ئازادی ڕاگەیاندنی یەكێك لەستونە سەرەكیەكانی كۆمەڵگەیەكی دیموكراتیك و ئازادە، كاری ڕاگەیاندنی ئازاد، هۆشیاركردنەوە و ڕۆشن كردنەوەی گەلە لەبەرامبەر بەدەستبەسەرداگرتنی ماف و ئازادیەكان و وەستانەوە لە دژ بەداگیركارییە.

لەبەر ئەوەیە كە دەسەڵاتدارە شۆڤینیەكان هەمیشە ڕاگەیاندنی ئازاد دەكەنە ئامانج و دەیانەوێت لاواز و بێ ئیرادەیان بكەن، بەڵام دەبێت هەم دەوڵەتی داگیركەری تورك و هەم هەموو داگیركەرەكانی سەر كوردستان و نۆكەر و بەكرێگیراوان و داردەستانی ئەو داگیركەرانە باش بزانن كە لێگەڕینمان لەپێناو حەقیقەت و ڕاستی بەهێزتر و بەگۆڕتر بەردەوام بكات و هیچ هێرش و فشارێك ناتوانێت لەخەبات و خۆڕاگری و لێگەڕینمان بۆ ژیانی ئازاد سارد بكاتەوە.

لەو پێناوەدا داوا لەسەرجەم میدیاکاران و بە تایبەت کەسانی خاوەن ویژدانی گەلەکەمان دەکەین کە خاوەندارێتی لەڕێچکەی شەهید گوڵستان تارا و هێرۆ بەهادین بکەن و درێژەپێدەری خەباتی شەهیدانی ڕاگەیاندن ببن و تا گەیشتن بەهیوا و خۆلیاكانی شەهیدان برەو بە تێكۆشانی كۆمەڵایەتی، ڕاگەیاندنی ئازاد و شۆڕشگێرانە بدەن، چون ئەوە تاکە ڕێگایە کە سەرکەوتنی ئازاد.