پلاتفۆرمی "ئێمە کۆتایی بە کوشتنی ژنان دەهێنین" (KCDP) لە ڕاپۆرتی مانگانەی خۆیدا ڕایگەیاند کە لە مانگی ئۆکتۆبەردا، ٤٨ ژن لە تورکیا کوژراون کە بەرزترین ئاماری مانگانەیە تا ئێستا. لەگەڵ ئەمەشدا، ٢٣ ژنی تریش لە بارودۆخی گومانلێکراودا گیانیان لەدەست داوە.

بەپێی ئەم ڕاپۆرتە، لە کۆی ٤٨ ژنی کوژراو، ١٠ کەسیان بەهۆی داوای تەڵاق، ڕەتکردنەوەی ئاشتبوونەوە، هاوسەرگیری یان پەیوەندی کوژراون. ٣ حاڵەت بەهۆی هۆکاری ئابووری، ٣ حاڵەت بە بیانووی خۆکوژی و یەک حاڵەت بە بیانووی سووکایەتی کوژراون. هۆکاری کوشتنی ٣١ ژنیش نادیارە.

پلاتفۆرمی "ئێمە کۆتایی بە کوشتنی ژنان دەهێنین" جەختی کردووەتەوە کە خەبات بۆ ڕاگرتنی کوشتنی ژنان لە تورکیا ١٤ ساڵە بەردەوامە و ئەم ڕێکخراوە لە ساڵی ٢٠١٠ـەوە ئاماری پەیوەست بە کوشتنی ژنان بڵاو دەکاتەوە. ئەوان وەزارەتی ناوخۆیان تۆمەتبار کردووە کە لە جیاتی پێشکەشکردنی ئاماری ورد و هۆکارەکانی کوشتنی ژنان، ڕاستییەکان دەشێوێنێت.

دامەزراوەی مافەکانی مرۆڤ، ڕێکخراوێکی چاودێری نێودەوڵەتی حکومەتی ئەردۆغانی تاوانبار دەکەن کە لە "ڕێگریکردنی پێویست لە کوشتنی ژنان و توندوتیژی دژی ژنان، منداڵان و کەمینە ڕەگەزییەکان" شکستی هێناوە.

زۆرێک لە ڕەخنەگران دەڵێن هۆکاری سەرەکی دۆخی ئێستا، سیاسەتەکانی حکومەتی پارتی داد و گەشەپێدانە (AKP) کە بە بەخشینی پارێزبەندی، پشتگیری لە پیاوانی توندوتیژ و دەستدرێژکەر دەکات.