ماوەییگە سپای پاسدارەیل لە ژێر ناو مانوڕ نزامی دەس کردیەسە جموجویل نزامی و ژمار فرەیگ هێز خوەی ڕەوانەی شاهۆ کردیە و تایم مانوڕەگەی درێژەو کرد.
ڕووژ ٢٧ پویپشەڕ سپای پاسدارەیل ڕژیم ئێران وە ئامانج ئەنجام دان مانوڕ نزامی لە بەرزایەگان شاهۆ دەس کردە جموجویل نزامی و ژمار فرەیگ هێزەیل نزامی، چەک و تەقەمەنی و تەجهیزات نزامی فرەیگ، رەوانەی شاهۆ کرد.
سپای پاسدارەیل هەر لە قوڕی قەلا هەتا هەوراگەی پیازدۆڵ ک یەکێ وە ناوچەیل دڵنشین شاهۆە مانوڕ نزامی وەڕێوە بردیە و ئەو وەختە ئێلام کرد ک هەتا پەنج گەلاوێژ هاتنوچین وە ناوچەگە قەیەخەس.
ئمڕوو جارێ ترەک سپای پاسدارەیل ئێلام کرد ک مانوڕو هاتنوچین ئەڕا سێ ڕووژ ترەک درێژە دێرێ.
سپای پاسدارەیل لە ساڵ ١٣٨٦ وە ئامانج موقابلە وەگەر حزبەیل کوردی لە ناوجەیل شاهۆ چەندین پادگان نزامی دروس کردیە و هەمیشە لە ڕێ مانوڕ ژینگە لە ناو بەید.
ڕژیم ئیران وەتایوەت سپای پاسدارەیل وە ساڵانە لە ڕووژهەڵات کوردستان لە ڕێ مانوڕ نزامی بەش فرەییگ لە سروشت و ژینگە و دارسانەگان لە ناو بردیە و لەتمەی فرەییگ داس لە ناوچەگان.