پارت ژیان ئازاد کوردستان، پژاک، جمشت ئەلنزال ئەحواز و حزب مەردوم بەلوچستان لە باوەت شەپوڵ ئیعدام زندانیەیل سیاسی لە لایەن ڕژیم ئێران بەیانیەییگ هاوبەش بلاو کردن.

لەی بەیانیە جەخت کریاس، تەنیا ڕێ کوتایی هاوردن وە ئێعدام و کوشتار زندانیەیل،،، هەڵوێست ڕادیکال، دموکراتیک و بەشداری وەردەوام لە مەیدان موبارزەس.

پارت ژیان ئازاد کوردستان پژاک، جمشت ئەلنزال ئەحواز و حزب مەردوم بەلوچستان لە بەیانیەگەیان ئێلام کردنە: "وە پای خەوەرەیلێ کە وە دەسمان ڕەسیە نزام فاشیست ئێران لیست دو هەزار زندانی ئەڕا ئێعدام کردن ئامادە کردیە و ئیە هەڕەشەییگ لە دژ گشت گەلانە."

لە بەشێگ ترەگ بەیانیەگە هاتیە: "لە ناو ڕووژەیل وەرین چوار زندانی سیاسی کورد وە ناوەیل" موحەمەد فەرامەرزی، پژمان فاتحی، موحسن مەزڵوم و وەفا ئازەر بار لە سێدارە دریان، ئیسەیش" عەلی عوبەیداوی، ماڵک موسەوی و عەباس دریس" و فرە چالاک ترەک لە لیست ئێعدام قەرار دێرن."

"ئامانج ئەسڵی نزام فاشیست ئێران لە ئێعدام کردن فرەتر کردن ترس و وەحشەت لە ناو گەلانە و هاوەخت تەقەلا کەی وەی کارە نواگیری لە ڕمیان خوەی بگرێ."

"ڕژیم ستەمگەر ئێران ئەڕا حفز خوەی لەی ڕەوشە ناچارە سیاسەت سەرکوت و ئێعدام لەوەر بگرێ و ئیسە ماشین ئێعدامەگە هاوشیوەی ساڵ ٦٧ کەفتیەسە کار."

"ئەڕا موبارزە وگەرد هێرش تازە وە سەر ڕووڵەی گەلان ئێران لە ناو زندان هەر چەن ناڕەزایەتی لە داخڵ و دەیشت توانێ تا حەدێگ تاسیرگوزار بوود، بەڵام ناتوانێ ماشین سەرکوت و ئێعدام لە کار بخەی."

"بەڵام تەنیا ڕێ کوتایی هاوردن وە ئێعدام و کوشتار زندانیەیل، هەڵوێست ڕادیکال، دموکراتیک و بەشداری وەردەوام لە مەیدان موبارزەس."

"وەیخاترە لازمە ئەڕا موبارزە لە وەرانوەر رژیم ئێران ناڕەزایەتی ڕێکخستن کریاگ لە داخڵ بخریەدە بەرنامەی کار و ڕژیم ناچار وە عەقب نشینی بکەید."

"گەلان زوڵم وە لێ کریاگ، خانەوادەی زندانیەیل یەکێ لە نیروەیل تاسیرگوزار لە موبارزە وەگەرد ئێدامەگانن و وە وە ناڕەزایەتی لە وەر زندانەیل و هەناردن پەیام و سەوتی و تەسویری توانن تاسیر فرەترێ داشتوون."

پارت ژیان ئازاد کوردستان پژاک، جمشت ئەلنزال ئەحواز و حزب مەردوم بەلوچستان لە ئاخر بەیانیەگەیان ئێلام کردنە: "هەوەجەس بنەماڵەی زندانیەیل گول وەکیلەیل حکومەتی نەخوەن و لازمە خوەیان خەت ئەوەڵ ناڕەزایەتی تەشکیل بیەن، چون ئەگەر بنەماڵەگان بانە مەیدان گەلانیش پەیوەست بونە پیان."