کوومەڵگەی ژنەیل ئازاد ڕووژهەڵات کوردستان کژار لە هەیمەی نەورووز وە بڵاو کردن داخویانیگ بەرخوەدان و موبارزەی کوومەڵگایەیل لە یەی ساڵ ویەردە وە ویر هاوردیە و داوا لە گشت کردیە، وە روحیەی ئنقڵابی ژن ژیان ئازادی، ئاگر نەورووز ئیمساڵ بڵێزەدارتر لە هەر وەختێ ترەگێگ لە کویچە تا خیاوان، ئاوایی و شار، داگیرسنن.

کژار لە داخویانیگەی وە بوونەی هاتن جەژن نەورووز وەتیە: لە وەختێگە چیمنە پیری نەورووز، دەنگ بەرخوەدان و موبارزەی خەڵقەیل ئازادیخواز، وە دەسپێشخەری ژنەیل لە کوردستان، ئێران و ڕووژهەڵات ناوەراس ڕەسێدە گوش.

"فرەتر وە ساڵ و نیمێگە ک ئنقڵاب ژن ژیان ئازادی کەفتیەسە ڕێ، ئنقڵابێگ ک ئاگر دڵ, سەر لە نوو بڵێزەدار کرد و کەفتە گیان زوڵم تا ک ڕیشەگانی بسوزنێد."

"ئنقڵابێگ ک ژیان مانادارتر لە هەر وەخت ترەگ کرد و توانست گشت لە ئی مانادارکردنە هاوبەش بکەید، موبارزەی وەرفراوان،سەرهەڵدانەیل پەیەڵپەی و ناڕەزایەتیەیل ئاماجدار، نیشان لە ئی ماناداریەسە."

"شوعار ژن ژیان ئازادی لە کویەسانەگان کوردستان دەسوەپی کرد و ڕەسیە کویچە، خیاوان، ئاوایی و شارەگان کوردستان. شوعارێگ ک مانای، رزگاری لە ژێر زوڵم، دوچەوەکی و هەڕەشەس و ها شوون سازین ژیانیگ ئازاد و دمۆکراتیک. هەر ئیە بیە مدوو ئەوە ک ئەدەبیات بەرخوەدان و موبارزە بخوڵقنێ."

کژار لە درێژە ئاماژە وە ئەوە کردیە هەر چەن فشار و سەرکوت فرەیگ بی، ئەمانێ ژنەیل لە هەشت مارس نیشان دان ک کاریگەری ئنقڵاب ڕەنگ و بوو تایوەتێگ داسە موبارزەیلیان.

هەلیوا وە هویر هاوردن ویرمان شەهیدەیل ئنقڵاب و تاریم هەڵوژادن دەسەڵات، خەوەر لە هاتن وەهار سەوز ساڵ بانان دەید.

لە درێژەی داخویانی ئاماژە وە پێشوازی گەرم خەڵک کورد لە هەر چوار بەش کوردستان لە نەوڕووز کردیە و نویساس: خەڵق کورد، لە گردبینەوەیل جیاجیا، لە بان ئازادی فیزیکی ڕێبەر ئاپۆ جەخت کردنە و وەتنە: ئاگر نەورووز ئیمساڵ، گەرمایی یەکیەتی و چالاکی هاوبەش خەڵقەیل ئازادیخواز فرەتر لە جاران کەید.

لە ڕووژهەڵات کوردستان و ئێران ڕووژەیلێگە نەورووز وە شوعار ژن ژیان ئازادی دەسوەپێ کردیە و داڵگەیل شەهیدەیل، چوپی وە دەس، داخواز ڕوولەگانیان تێرنە زوان.

ئەوان ئی کەشە دەسەیل ڕوولەیل تر ئی نیشتمانە گرنە ناو دەس و شان وە شان و لە پاڵ یەک، پایان موحکەم تر لە هەر وەختێگ کوتنە زەوی و لە کەسەیل ترەگ توان ک بەشدار ئی حەڵقەی رەنگین هەڵپەرکە بن. خەڵقێگ ک وە نیشتمان و فەرهەنگێ گرێدریاس و لاپەرەیل زەرین بەرخوەدان نویسێد.

کژار لە ئاخر داخویانیەگەی سەروار پیرووزبایی جەژن نەورووز لە ڕێبەر ئاپۆ، ژنەیل و گشت بەشەیل کوومەڵگە، لە گشت خەڵقەیل ئازادیخواز لە سەرانسەر کوردستان و ئێران داوا کەید، وە هەمان روحیەی ئنقڵابی ژن ژیان ئازادی، ئاگر نەورووز ئیمساڵ بڵێزەدارتر لە هەر وەختێ ترەگێگ لە کویچە تا خیاوان، ئاوایی و شار، داگیرسنن و فەرهەنگ و مانای نەورووز وە جەهانیەیل نیشان بیەن.