لە پەنجمین ڕووژ ساڵ نووو، لە مەرزەیل دەسکرد ڕووژهەڵات و باشوور کوردستان، ٣ کووڵبەر لە ئاکام گولەی راسەوراس، وسان دڵ و زوقوم گیانیان لەدەسدان. ٣ کووڵبەر ترەگیش وە گولە هێزەیل نزامی زامدار کریان. کووڵبەرێگ نەوجەوانیش ڕووژ هەینی لە بەرزایی کەفتیەسە خوار و لە ناحیەی پا تویش شکستگی بیە
ئێوارەی ڕووژ یەکشمە لە ناوچەیل مەرزی هەنگەژاڵ بانە، کووڵبەرێگ ٢٢ ساڵان خەڵک بانە وە ناو سۆران عەبدی وە گولەی راسەوراس هیزەیل نزامی ئێران وەقورسی زامدار و لە ڕێگای هناریانێ وە نەخوەشخانە گیانێ لەدەسدا.
سۆران عەبدی وە مناڵی بازیگەر فیلم سینمایی "خوداحافز ئانالوگ" بیە.
هیوا ئەمین‌نژاد کارگەردان ئەی فیلمە لە سەفحەی ئینستاگرام خوە نووساس کە سۆران عەبدی وە مناڵی لە فیلمەگەی ئەو نەقش "دیاکو" بازی کردیە.
لەلای ترەگ، هەر ڕووژ یەکشەممە ٥ خاکەلێوە، کووڵبەرێ ٤٠ ساڵان وە ناو موحەمەدبایەر موحەمەدی لە یەکم ڕووژ کووڵبەری، وەخاتر وسان دڵ لە ناوچەی مەرزی نەوسوود گیانێ لەدەسدا.
ئیە لە حاڵیگاس، ک ٣ شەو وەرجە ئیە، میلاد موحەمەدی کوڕ ١٥ ساڵان ئی کووڵبەرە، لەناوچەی مەرزی نەوسوود لە وەخت کووڵبەری لە بەرزایی کەفتویەخوار و لە ناحیە پا تویش شکستگی بیە.
دویەشەو لە ناوچەی مەرز میشیاو شارسان سەقزیش کووڵبەرێگ ١٥ ساڵان وە ناو هەستیار عەبدولکەریم وەمدوو زوقوم گیانێ بەختکرد و ئیمڕووژ تەرمەگەی وە نەخوەشخانە هناریا.
هاوەخت لە ناوچەیل مەرزی مەریوان، نەوسوود و بانە ٣ کووڵبەر وە ناوەیل میلاد حوسەینی ١٦ ساڵان، خەڵک دیواندەرە، جەمیل عەبدی خەڵک جوانڕۆ و ئاروین حەقانی وە گولەی هێزەیل نزامی ئێران زامدار کریان.