قەرار بازداشت ٣ کەس لە دەسگیرکریاگەیل شووڕش ژن ژیان ئازادی وە تومەت فساد فێئەرز جارێ ترەگ دڕێژەو کریا.
شەبەکەی ماف مرووڤ کوردستان لە گوزارشێگ نویساس، لە ڕووژەیل وەرین قەرار بازداشت ٣ هاووڵاتی خەڵک بۆکان وە ناوەیل" رەئۆف شێخمەعروفی، کامران سولتانی و موحەمەد فەرەجی ک لە وەخت شووڕش ژن ژیان ئازادی لە ئی شارە دەسگیر کریانە، لە لایەن دادگای گشتی و ئنقڵاب ڕژیم ئێران لە بۆکان ئەڕا ماوەی ٢ مانگ ترەگ دڕێژەو کریاس.
رەئۆف شێخمەعروفی، کامران سولتانی و موحەمەد فەرەجی لە وەخت شووڕش ئازادی ژن لە ڕووژەیل ٥ بەفرانبار، ٣ رەشەمە و ٨ ڕەشەمە لە لایەن هێزەیل ئەمنیەتی ڕژیم ئێران دەسگیر و وە بازداشتگای ئدارەی ئتڵاعات لە ئۆرمیە بریان.
ئی ٣ هاووڵاتیە لە بازداشتگای ئەمنیەتی ئەڕا ئعتراف زورەکی و قەبول و بەشداری لە قەتڵ یەکێ لە ماموورەیل ئەمنیەتی لە ژێر شکەنجەی رۆحی و جسمی قەرار گردنە، ئەمانی سەربار گشت فشارەیل ، ئی ٣ هاووڵاتیە ئی تومەتەیلە رەد کردنە.
لە ٢٠ جویەزەردان ساڵ ١٤٠٢ لە شوون کۆتایی هاتن وە دەوران بازجوویی، ئی ٣ هاووڵاتیە وە زندان ڕژیم ئێران لە شار بۆکان بریانە و لە ئەوردا زندانی کریانە.
رەئۆف شێخمەعروفی، کامران سولتانی و موحەمەد فەرەجی لە وەخت دەسگیری تا ئیسە لە داشتن ماف وەکیل دیارکریاگ بێبەش کریانە و وەپەی ئعلام دادگای وەکیل دەسنیشانکریاگ ئەڕا ئەوان دیاری کریاس.
تومەت فساد فیئەرز وە ئی ٣ هاووڵاتیە نگرانیەگان لە بارەی خەتەر داسەپانن حوکم ئێعدام وە سەریان زیاتر کردیە.