![](https://aryen.tv/media/images/1721918445.jpg)
دینا قالیباف رووژنامەوان وە یەکێ لە زندانی سیاسیەگان جمشت ژن، ژیان، ئازادی، رووژ پەنجشەمە ٤ مۆرداد لە ناو لاپەڕەی ئینستاگرام خوەی، دڵنوشتەی نۊساس ک تلویزیون ئاریان تیوی وە گویش کوردی خوارین تەرجومەی کردیە.
دینا سابقەی کار رووژنامەوانی گەرد چەندین خەوەرگوزاری دیری و چاڵاکوان دانشجویی رشتەی علووم سیاسیە ک لە سەر ئاشکارا کردن خشوونەت پولیس رژیم ئێران، رووژ بیست هەشت فەروەردین ئمساڵ گیریا، وە حۆکم زندان دو ساڵ زندان و جەریمەی نەقدی ئمرو ئەڕای هاتیە ک تا پەنج سال تەعلیق خواردیە.
دینا قالیباف ڕووژنامەوان و یەکێگ وە زندانییەیل سیاسی وەرین لە نامەگەێ ئەڕا پەخشان عەزیزی ک سزای ئێعدام ئەڕای بڕیاس و ئەڕا وریشە مورادی و نەسیم غوڵامی، وە ئیجوورە هەست خوەی هاوردیەسە زوان:
زوورم شەوەگان خەوەیلێگ دوینم، ئەمانێ وەناوێ پەژارەیگ هەس. لە خەوەگانم ئاسمان، لە کویەیل زندان ئڤین، ساف ساف دوینیەد. دیێن ئی مەنزەرە لە خەو, خوەشە، چمانێ هەمرای وە جوور هەمان ڕووژ توانم هەست بکەم ک چەنێگ خوەشاڵم لە ئاگاهی شاپوور وە ئڤین بریام، لە خەوم هەنایگ چمە ناو هەوش، لەوای ڕووژ یەکم وەگەرد پەخشان و نەسیم خەریک بازی کردن واڵیواڵم. وەرزش, زەین گشت ئارامترەو کەید، زەین نەسیم فرەتر لە گشت.
لە خەوم، ناوزگ ژان دوجارە هەست کەم، ئەمانێ، هەنایگ چەو واز کەم دوینم، وریشە ها بان سەرم ک وە ڕوین زەیتون زگم ماڵێد. هەڵس و بنیش داڵگانەی وریشە لە ناو زەینم جێ گردیە و هەریز لا ناچوود. گاجار لە ناو خەو لە خەزەو هاوار کەم، دەمچەو وریشە تێدە هویرم ک لە ڕووژێگ ک ئازادیم خوەندن، گارد زندان ڕشیانە سەرێ و دەسێ پێچ داوین. ئەو ڕووژە لە شوون ئەوەیگە وریشە تویش دڵەراوکی فرە بیوی، بردیمنەی بان تەختەگەی، وە مدوو فرەیی خەزەوم، لە ناو هەوش زندان هاتم و چیم و هویر کردم، چەنێگ توانم چیێنم بخەمە دویا تا دڵنیا بووم، هاڵ وریشە خاستر بیە و عەزاب وژدان، دەسەیلێ لە حەڵق سەمانە لاوردیە؟
من لە زندان بیمە، ئەمانگ هەر جار وە خەوەیلم خوەم دوجارە لە ناو زندان دوینم، رەستەی نەسیم لە گوشم خڕ خوەید: وەکیل وەت قازی شەمشیر لە روی بەساس، توای حوکم ئێعدام بیەد.
من لە زندان ئازاد بیمە ئەمانێ لە ئەو ڕووژە لە خەوەیل پەشێو شەوانەم، پەخشان دوینم ک رویوەروی میز پینگپۆنگ موجەسەمەی "داڵگ" وەدەسەیل کیشاس، واڵیواڵ بازی کەیم و ئەو ئەڕا یەکم جار من وەگەرد ناو شلێر هەمان ژن کورد ئاشنا کەید. ژنێگ ک وەرجە ئەو دیدارە وەگەرد پەخشان ناوێ وە گوشم نەخواردیوی و لە شوونێ زانستم قسەی پڕ خەم ئی ژن کوردە بی، ژنەیل کوردستان ئەڕا ژینا هەناردە ناو خیاوان.
من لە زندان ئازاد بیم ئەمانگ بەشێگم لە پاڵ نەسیم، پەخشان و وریشە وە جێ مەند و لە دویرەو، لە هەوش زندان نووڕێدە پەخشان ک خەریک دەسمیەتی دایێن وە دویەت یەهودیێگە ک لە نەخوەشی سەرع ڕەنج کیشێد؛ سەروار گشت جیاوازیەیلێگ ک لە هویرشە دێرن. بەشێگ وە من هەرایهەر لە هویر مردن و لە جەنگ وەگەرد ئێعدام وە جێ مەند، لە بێ دەنگی وەگەرد پەخشان و ئەڕا وریشە مانگردن لە خواردن گرد و ئیرنگەیش ئەڕا تەنیا گوناهەیل هاوبەندیێ یانێ کورد و ژن بیێن ئەسر ڕشنێد.
من ژنێگ ئازاد لە دەیشت زندانم ک هەر شەو هویر کەم، خوارزای نەسیم چەن ڕووژتر وە بێ مەقنە بچوودە خوەندنگە تا دەس ئاخر میمگێ لە زندان بایدە دەیشت و ئەو لە باوش بگرێد؟
ئمشەو ک بایدەو، دوجارە لە خەوم پەخشان، وریشە و نەسیم دوینم، یانێ ئیوە بویشین ئی کەشە، دەرفەت وەدەس تێرم، تا لە خەو وە ئەوان بویشم، هەر ڕووژ وە فکریان ژیان کردمە؟