شەبەکەی ماف مرووڤ کوردستان گوزارش پایماڵکاری ساڵ ٢٠٢٣ لە رووژهەڵات کوردستان ک لە ئەنجام مدووەیل زوانی، مەزهەبی، فەرهەنگی، جنسیەتی، سیاسی و باوەتەیل ترەگ بیە، ئعلام کردیە.

ئی ناوەند ماف مرووڤی وەتیە، ئی ئامارە تەنیا ئەو موردەیلە لە وەر گرێد ک لە لایەن ئەوان تەیید کریاس، ئەمانێ فرە وە موردەیل ترەگ وە هوکارەیل جیاواز لەوانە فشار ناوەندەیل ئەمنیەتی لە سەر خانەوادەگان لە رسانەیل و ڕێکخراوەیل ماف مرووڤی وە ئەوانە ئاماژە نەکریاس.

وە پای گوزارشەگە، لە ساڵ ٢٠٢٣ لایکەم ٧٤٥ کەس و چالاک کورد، لە لایەن هێزەیل ئەمنیەتی یا ک ناوەندەیل قەزایی جمهوری ئسلامی لە شارەیل ئیلام، ئورمیە، سنە، کرماشان، تەیران، ئازەربایجان، خوزستان، خوەراسان ڕەزەوی و مازەندەران وە مدووەیل سیاسی دەسگیر کریانە.

هەلیوا لایکەم ١٧٣ کەس و چالاک کورد لە لایەن دادگایەیل قەزایی و دادگای واورێز روحانیەت سزا وەسەریان داسەپیاس یا سزاکەیان پەسەن کریاس.

لە ساڵ ٢٠٢٣ ژمار فرەیگ لە خانەوادەیل دادخواز ک ڕووڵەگانیان لە وەخت ئنقڵاب ژن ژیان ئازادی یا ساڵەیل ویەردە لە لایەن ڕژیم ئێران شەهید کریانە، لە ژێر فشار، دەسگیری و داسەپان سزا رویوەروی بینە.

لایکەم ٢٠ مەلا و چالاک کورد ئەهل سونەت و ١٠ چالاک کورد یارسانی، چڕیانە، دەسگیر و سزا یا ئعدام وەسەریان داسەپیاس.

هەروەیجوورە هلایە ٢٩ کووڵبەر گیانیان وە دەس دانە ک ٢ کەسیان مناڵ کووڵبەر بینە و دەسکەم ٢٢٨ کووڵبەر ترەگ زامدار بینە. کولبران

لە زندانەگان ڕژیم ئێران ١٥٨ زندانی ئعدام کریاس.

١١ زندانی کورد لە ئی ساڵە سزای ئعدام وەسەریان داسەپیاس و هەلیوا لایکەم ١٣ کەس ترەگ وە تومەتەیل تر لە خەتەر داسەپانن سزای ئعدام جێ گردنە.

لە ساڵ ٢٠٢٣ هڵایە ٥ کەس کورد لە زندانەیل و بازداشتگایەیل ئێران لە ژێر شکەنجە کوشیانە. لە پاڵ ئیەیشە دو زندانی کورد وە مدوو نەوین دەسرەسی وە دەرمان و نەخوەشخانە لە زندان گیانیان وەدەس دانە.

هەلیوا، ساڵ ٢٠٢٣ زایینی لایکەم ١٤ شاروەند کورد لە لایەن هێزەیل ئنتزامی، سپا و حجاببانەیل حکومەتی کوشیانە.

دو کەس وە ناوەیل بامشاد سوڵەیمانخانی و مەنسوورە سەگوەند وە شیوەی گوماناوی لە ئاودانان گیانیان وەدەس دانە.

سێ ئەندام حزب دمۆکرات کوردستان ئێران لە باشوور کوردستان ترۆر کریانە و یەی وەکیل رووژهەڵاتیش لە هەولێر لە هێرش ترۆریستانەی هێزەیل ڕژیم ئێران زامدار بی.

لە ساڵ ٢٠٢٣ لایکەم ٣٦ کارگەر کورد، لەوانە ٢ مناڵ لە ئاکام رویداوەیل کار گیانیان وە دەسدانە. دو کارگەر پترۆشیمی چوار ئیلامیش لە شوون دەرکردن، دەس وە خوەیکوشی دان و گیانیان وەدەسدانە. لایکەم ٣١ ژن لە ئاکام زهنیەت پیاسالار کوشیانە، ٤ ژنیان ژێر ١٨ ساڵ بینە ک ٣ کەسیان مناڵ هاوسەر بینە.

لە ئەنجام تەقین مین، ٨ کەس کوشیاس و ٦ کەسیش زامدار بیە. هەلێوا کەسێگ خەڵک شارسان بانە لە ئەنجام تەقین مین لە هەرێم کوردستان گیانێ وەدەسداس.

دو پەناخواز ڕووژهەڵات کوردستان لە ڕێ ئرووپا گیانیان وەدەس دانە و ٢ پەناخواز ترەگ هەتا ئیسکە چارەنویسیان نادیارە.