کوومەڵگەی ژنەیل ئازاد ڕووژهەڵات کوردستان، کەژار، لە داخویانێگ ک بلاو کردیە داوا لە گشت ئازادیخوازەیل و ناوەندەیل ناونەتەوەیی کردیە ، بیێن وە دەنگ وریشە مورادی، توانێ کووتایی وە سیاسەت ئێعدام بارێد و ئجازە نەیریەد وە ناو جەنگ لە دەیشت لە مەرزەگانێ، جنایەت ناوخوەی پەردە پووش بکەید.

کوومەڵگەی ژنەیل ئازاد ڕووژهەڵات کوردستان لە بەیانیەگەی کە ڕووژ دووشەمە ٢٣ ڕەزبەر بڵاوی کردیە، نویساس: جەنگ جەهانی سێهم فرەتر لە دو دەهەس وە شیوەیل جیاواز لە بەشەیل جیاجیای ڕووژهەڵات ناوەراس دڕێژە دێرید،و جەنگ ئەفروزی فەرامەرزی دەوڵەت-نەتەوەیل مەرزەیل ئەخڵاقی لەبەین بردیە.

جەنگەیلێگ ک ئەنجام گرێد هویچ خەوەریگ وە دموکراسی نایەید بەڵکێ خەوەر لە بیێن فاشیزم لە مەنتەقەس و دەرئەنجامێ تەنیا و تەنیا نەسڵ‌کوشیە.

دەوڵەت ئێرانیش وەجوور یەکێگ وە دەوڵەت-نەتەویل مەنتەقە ساڵەیل فرەیگە دەسداسە سەرکوت موخاڵفەیل ناوخوەی و وەرفراوانترکردن جەنگەیل دەیشت مەرزەیل.

ئی سیاسەت پیاگسالارانە تەنیا ئەڕا هازدارترکردن بنەوای دەسەڵاتە و قازانج حاکمەیل بانتر لە چینەیل کوومەڵگە جێ‌گرێد.

دەسەڵاتدارەیل ک ڕووژانە، فەتوا، قانوون و لایحەی نوو ک جنسیەت گەرا، نەتەوە گەرا و دین گەراست، دەنە دەیشت تا ئرادەی کوومەڵگە بخەنە ژێر پا و بێ‌دەنگی بسەپننە سەر کوومەڵگە.

کەژار وە خستنە وەرباس ئیەیگە، حاکمیەت ئەڕا هژمۆنی خوەی لە ناوچە، چەم خوین خستیەسە ڕێ ئەمانێ خاس زانێد ک ئیە کوومەڵگەس دەسەڵاتداری ئەوان زەعیف کردیە، وەتیە: یەکیەتی گەلان واورێز ژنەیل لە خیاوان، ترس خستیەسە دڵ حاکمیەت و هاوار ئاشکار ژنەیل لە زندان، نارەزایەتی پەیەڵپەیان، هاودەنگی ئازادیخوازەیل لە ئاست ناونەتەوەیی وەگەرد ژنەیل لە زندان، بیەسە مدوو دەسپاچگی ڕژیم. وە ئی مدووە ئەڕا سەرکوت هێزەیل ئازادیخواز لە زندان لە هویچ کارێگ درێخ ناکەید.

بێجگە سەرکوت، تەقەلا ئەڕا شاردن سەرکوتەگان دریەد، وە جوورێگ چمانێ دژبەرێگ نیە و ئەیەریش هەس جواو ئەوە، تەناف دار و ئوتاق تاکەکەسیە.

کەژار سەروار ئاماژە وە ئەوەیگە وەگەرد فشارەیل ڕوحی و رەوانی، بڕیان حوکم ئێعدام لە یەی ساڵ ویەردە فرەتر بیە، وەتیە: هەڤاڵمان وریشە مورادی یەکێگ وە ژنەیل دەسپێشخەر زندانە ک لە گەلاوێژ دەسگیر و ئێرنگە لە زندان ئڤینە. لە ئی ماوە ئەو لە ژێر شکەنجەیل رەوانی جێ گردیە و لە دیدار وەگەرد وەکیل و خانەوادە بێ بەشە، ئەمانێ سەروار هەڕەشەگان و شکەنجەیل فرە، هەمویشە تەقەلا کردیە دەنگ خوەی و ئەودویای زندانیەیل سیاسی وە کوومەڵگە بڕەسنێد.

لە درێژەی داخویانی ئاماژە کریاسە بەرتەک وریشە وە سزای ئێعدام ئەڕا پەخشان عەزیزی و شەریفە موحەمەدی و داخواز لاوریان ئێعدام، وەتیە: وریشە لە نامەیگ لە زندان ئڤینەو روی وە کوومەڵگەی ئازاد و ناوەندەیل ناونەتەوەیی نویساس: ئەڕا نیشاندان رەوش ئێرنگەیی و هاووەخت لە وەرانوەر ستەمەیل سەپیاگ وە ئازایخوازەیل دەس وە مانگردن بێ مەرز دەید. ئیجوور هەڵوێستێگ وە ئاماج ڕویوەڕوی بیێن وەگەرد کەمڕەنگ بیێن کوشتارەیل ناوخوەی و ئێعدامەیل ئەنجام گردیە ک لە پاڵ کوشتارەیل ناو جەنگ دێرێد ڕویدەید.

کەژار لە ئاخر داخویانیەگەی نویساس: هەڤاڵمان وریشە مورادی، دەنگ کوومەڵگە و واورێز ژنەیل مەینەت دیە ک رووژانە ڕویوەڕوی هویژمەیل جمهوری ئسلامی بوونەو. هاووەخت دەنگ گشت ژنەیلێگە ک لە ڕێ وەدەسهاوردن ئازادی هەنگاو هەڵگردنە، پارێزوانی لە وریشە، پارێزوانی لە دەنگ ئازادیخوازی ژنەیلە.

وەجوور کەژار لە ژنەیل چالاک و موبارز، کوومەڵگەی ئازادیخواز، گرووپ و سازمانەیل ناونەتەوەیی داخواز کەیم لە هەڵویست ڕفیقمان پارێزوانی بکەن. پشتیوانی لە وریشە بکەن تا کووتایی باید وە سیاسەتەیل دژ مرووڤی ئێعدام و ئجازە نەیەن جمهووری ئسلامی، وە ناو جەنگ لە دەیشت لە مەرزەگانێ، جنایەت ناوخوەی پەردە پووش بکەید.