ڕێکخراوی "کانوونی نووسەرانی ئێران" لە ساڵڕۆژی ناڕەزایەتییەکانی خەزەڵوەری ١٣٩٨دا، بە دەرکردنی بەیاننامەیەک ناڕەزایەتی خۆی دەربڕی بەرامبەر بە دەرکردنی سزای لەسێدارەدان بۆ وریشە مورادی، ئەندامی کۆمەڵگەی ژنانی ئازادی ڕۆژهەڵاتی کوردستان، کەژار و پەخشان عەزیزی، چالاکوانی مەدەنی و کۆمەڵایەتی و هەروەها سەپاندنی سزای لە سێدارەدان بەسەر تۆمەتبارانی دۆسیەی ناسراو بە "شارۆچکەی ئەکباتان"دا.

ئەم بەیاننامەیە کە لە ٢٧ی خەزەڵوەر بڵاو کراوەتەوە، نیگەرانیی خۆی دەردەبڕێت سەبارەت بە زیادبوونی سەرکوتکاری و دەرکردنی سزای لەسێدارەدان لەلایەن رژیمی کۆماری ئیسلامیی ئێرانەوە.

لە بەیاننامەکەدا، کانوونی نووسەران جەختی کردووەتەوە کە سزای لەسێدارەدان بە سزایەکی دژە مرۆیی دەزانێت و دەرکردنی ئەم جۆرە حوکمانە بۆ هەموو تۆمەتبارێک بە هەر تۆمەت و بیروڕایەکەوە شەرمەزار دەکات.

هەروەها ئاماژە بەوە کراوە کە وریشە مورادی و پەخشان عەزیزی لە ماوەی دادگاییکردنیاندا لە مافی هەبوونی پارێزەری دەستنیشانکراوی خۆیان، دەستڕاگەیشتن بە دۆسیەکەیان و دەرفەتی بەرگریی کاریگەر بێبەش کراون. بە گوتەی ئەم ڕێکخراوە، حوکمی لەسێدارەدانی ئەوان لەسەر بنەمای داواکارییەک دەرچووە کە لەلایەن دەزگا ئەمنییەکانەوە دیاری کراوە.

کانوونی نووسەران هەروەها جەختی لەسەر مافی دادخوازی و ئازادیی دەربڕین بۆ زیانلێکەوتووانی خەزەڵوەری ١٣٩٨ و شۆڕشی "ژن، ژیان، ئازادی" کردووەتەوە و داوای لە خەڵک کردووە کە دەنگی خۆیان دژی سەرکوت و لەسێدارەدان بەرز بکەنەوە.

لە بەیاننامەکەدا هاتووە کە کۆماری ئیسلامی بە سەرکوتی بەرفراوان و بەکارهێنانی ئامرازی وەک جێبەجێکردنی حوکمی لەسێدارەدان، بڕیاری خۆی بۆ بەرەنگاربوونەوەی شەپۆلی ڕوو لە زیادبوونی ئازادیخوازی و وشیاریی خەڵک نیشان دەدات.

کانوونی نووسەرانی ئێران بە ئاماژەدان بە هەڵسوکەوتی ئەمدواییەی حکوومەت لەگەڵ بنەماڵە دادخوازەکانی سەرکوتەکانی ٩٨ و شۆڕشی ژن، ژیان، ئازادی ئەم کردەوانەی بە بەڵگەی ترس و بێدەسەڵاتیی حکومەت لە بزووتنەوەی جەماوەری داناوە.