یەکێتیی ئەورووپا بە توندی دژایەتیی بڕیاری "ڕێکخراوی وڵاتانی تورک" دەکات بۆ بەخشینی پێگەی چاودێر بە کۆماری خۆ ڕاگەیاندراوی باکووری قوبرس لە ڕێکخراوەکەیاندا. ئەم هەنگاوە لە کۆبوونەوەی دواییدا لە بیشکەک، پایتەختی قرغیزستان، ئەنجام درا.

جۆزێپ بۆرێل، بەرپرسی سیاسەتی دەرەوەی یەکێتیی ئەورووپا، لە ڕاگەیەندراوێکدا ئەم کردەوەیەی بە هەوڵێک بۆ ڕەوایەتیدان بە وڵاتێک وەسف کرد کە لە ڕوانگەی کۆمەڵگەی نێودەوڵەتییەوە بە فەرمی نەناسراوە. بۆرێل جەختی کردەوە کە یەکێتیی ئەورووپا تەنها کۆماری قوبرس وەک نوێنەری یاسایی هەموو دوورگەکە بە فەرمی دەناسێت.

یەکێتیی ئەورووپا ڕایگەیاند کە هەر هەوڵێک بۆ بە یاسایی کردنی "کۆماری تورکی باکووری قوبرس" ڕەت دەکاتەوە. بۆرێل گوتی ئەم هەنگاوانە پێچەوانەی بنەماکانی پەیماننامەی نەتەوە یەکگرتووەکان سەبارەت بە یەکپارچەیی خاکە. هەروەها ئاماژەی بەوە کرد کە یەکێتیی ئەورووپا تەنها کۆماری قوبرس بە فەرمی دەناسێت، بەپێی بڕیارەکانی ئەنجومەنی ئاسایشی نەتەوە یەکگرتووەکان.

لەلایەکی دیکەوە، ڕەجەب تەیب ئەردۆغان، سەرۆک کۆماری ڕژیمی تورکیا، لە کۆبوونەوەکەدا داوای پشتگیری زیاتریی "وڵاتانی تورک زمان" کرد بۆ باکووری قوبرس. ئەردۆغان جەختی لەسەر بەرپرسیارێتیی "جیهانی تورک" کردەوە بۆ دۆزینەوەی "چارەسەرێکی دادپەروەرانە" بۆ "کێشەی قوبرس".

کێشەی قوبرس دەگەڕێتەوە بۆ ساڵی ١٩٧٤، کاتێک تورکیا هێرشی کردە سەر دوورگەکە لە وڵامی کودەتایەک کە ئامانجی لکاندنی قوبرس بوو بە یۆنان. لەو کاتەوە، دوورگەکە دابەش کراوە. باشووری یۆنانی‌نشین کە لە ڕووی نێودەوڵەتییەوە دانی‌پێدانراوە و باکووری تورک‌نشین کە تەنها لەلایەن تورکیاوە بە فەرمی ناسراوە.

هەوڵەکانی نەتەوە یەکگرتووەکان بۆ چارەسەرکردنی ئەم کێشەیە تا ئێستا سەرکەوتوو نەبووە و دانوستانەکانی ئاشتی لە ساڵی ٢٠١٧ەوە وەستاون. یەکێتیی ئەورووپا جەخت لەسەر چارەسەریی دوو هەرێمی و دوو کۆمەڵگەیی بۆ قوبرس دەکاتەوە و پێی وایە هەر کردەوەیەک یارمەتی بە فەرمی ناسینی باکووری قوبرس بدات، پرۆسەی ئاشتی لاواز دەکات.